Foi inaugurada hoxe na Casa da Cultura de Chantada a mostra itinerante “O FIN DO CAMIÑO”, organizada polo Colectivo Egeria, e que conta co patrocinio da Xunta de Galicia a través do programa “O teu Xacobeo”. No acto participaron Manuel Varela, alcalde de Chantada; Ramón Rodríguez Porto, membro do Colectivo Egeria e responsable de Adegas Terras Bendaña e do premio Moncho do Pío; María Luisa García, bibliotecaria do Concello; e o presidente do Colectivo Egeria, Xulio Xiz.

Onte foi presentado na Biblioteca Provincial de Lugo o libro “Don Ricardo de Fingoi”, sobre os quince anos lucenses de Ricardo Carballo Calero. Á presentación asistiron vinte persoas que se inscribiron telematicamente e que completaron o aforo legalmente permitido.

Participaron no evento Javier Arias, delegado da Xunta de Galicia en Lugo; Valentín García, secretario xeral de Política Lingüística; Magalí Carballo, filla do escritor; Asunción Fernández (Siña), directora do Colexio Fingoi; e Xulio Xiz, presidente do Colectivo Egeria.

A exposición 'Do lucense Fraguas ao lucense Carballo Calero' abre a semana cultural que o colectivo Egeria e a Xunta de Galicia dedican en Lugo ao autor homenaxeado este ano no Día das Letras Galegas. Compleméntase cunha exposición na Biblioteca Pública Provincial e a presentación, o xoves, dun libro con lembranzas do paso do escritor polo colexio de Fingoi, todo elo baixo o paraugas do proxecto Don Ricardo de Fingoi, que vén desenvolvendo ao longo deste ano a asociación cultural co apoio da Consellería de Cultura, Educación e Universidade.

A exposición ‘Don Ricardo de Fingoi’, homenaxe a Carballo Calero por serlle dedicado o Día das Letras Galegas do presente ano, chegou hoxe martes, 13 de outubro, ao IES Perdouro de Burela (Lugo), onde foi presentada ás 10:40 e ás 12:00 horas a dous grupos de alumnos do centro.