Presentouse na Casa da Cultura de Cospeito a mostra 50 ANOS DO BELÉN DE BEGONTE (1972-2022), proxectada polo Colectivo Egeria e o Centro Cultural José Domínguez Guizán (impulsor do Belén de Begonte), apoiada pola Xunta de Galicia e o Concello de Begonte, e que resume a vida e actividade deste Belén electrónico que a Xunta declarou en 2014 “de interese turístico galego”. Participaron no acto o alcalde de Cospeito, Armando Castosa, e o Presidente do Colectivo Egeria e vicepresidente do Centro Cultural, Xulio Xiz.

Tivo lugar na Casa do Concello de Lourenzá a presentación da exposición MANUEL RODRÍGUEZ LÓPEZ, sobre a vida e obra do escritor de Paradela. Ademais, presentouse o libro "Manuel Rodríguez López, 25 anos despois", que recolle traballos de 50 personaxes destacados da cultura galega sobre a figura de Manolo Rodríguez. No acto participaron a alcaldesa de Lourenzá, Rocío López; a xefa territorial da Consellería de Cultura da Xunta de Galicia en Lugo, María José Gómez; a viúva do escritor, Irene López, e o presidente do Colectivo Egeria, Xulio Xiz.

O libro PIONEIRAS DE CIENCIAS DE LUGO, da profesora lucense María Isabel Fernández García, foi presentado en Ribadeo no Teatro municipal da localidade, no transcurso dun acto no que actuou o Coro do Sagrado Corazón, dirixido por María del Carmen Rodríguez Cancelo.

Presentou á autora a farmacéutica Montserrat Iglesias, membro do grupo ribadense que colaborou con María Isabel Fernández na investigación efectuada en Ribadeo sobre a vida da primeira “Pioneira de ciencias en Lugo”, a tamén farmacéutica Manuela Barreiro Pico.

Presentouse na Casa da Cultura de Vilalba a mostra 50 ANOS DO BELÉN DE BEGONTE (1972-2022), proxectada polo Colectivo Egeria e o Centro Cultural José Domínguez Guizán (impulsor do Belén de Begonte), apoiada pola Xunta de Galicia e o Concello de Begonte, e que resume a vida e actividade deste Belén electrónico que a Xunta declarou en 2014 “de interese turístico galego”.