Foi presentada na Biblioteca Pública Municipal Rosalía de Castro de Arzúa a mostra itinerante "PARADELA, SENDA INFINITA", que co gallo da celebración do bicentenario do Concello de Paradela, repasa a historia do mesmo ao longo de 16 paneis. A mostra conta co patrocinio do Concello de Paradela, a Xunta de Galicia, Abanca e Endesa, e este ano está a percorrer os concellos do Camiño Francés na nosa comunidade.

Foi presentada no Teatro de Ribadeo a obra "Ribadenses Destacados. 44 Biografías. Séculos XIX a XXI", coordinada por Francisco Díaz-Fierros Viqueira, e editada polo Colectivo Egeria, coa colaboración da Secretaría Xeral de Política Lingüística da Xunta de Galicia. Este libro recompila biografías de diferentes persoeiros que destacaron como artistas plásticos, músicos, xornalistas, mestres, intelectuais, científicos e inventores, políticos, xuristas, empresarios e benefactores que naceron, viviron ou desenvolveron unha parte significativa da súa obra en Ribadeo.

Tivo lugar na Biblioteca Pública Municipal Rosalía de Castro de Arzúa a presentación da exposición MANUEL RODRÍGUEZ LÓPEZ 2.0, unha nova edición da mostra sobre a vida e obra do escritor de Paradela, cun novo deseño gráfico, contidos actualizados e reestruturados, e un acceso inmediato a contidos multimedia adicionais a través de códigos QR.

O Círculo Saviñao de Escairón presentou o mércores 23 de novembro o libro Circular polo Saviñao IV, publicación coa que a sociedade cultural e recreativa quere conmemorar o seu 60 aniversario, e que foi editada polo Colectivo Egeria.

A presentación estivo a cargo de Valentín García, secretario xeral de Política Lingüística; Juan Carlos Armesto, alcalde do Saviñao; Olga Novo, colaboradora e Premio Nacional de Poesía 2020; e Enrique Sampil, presidente desta sociedade. Cada un dos socios do Círculo Saviñao recibiu gratuitamente un exemplar desta obra.