Este xoves 21 de marzo tivo lugar no CEIP Otero Pedrayo de Rábade (Lugo) a inauguración da exposición MANUEL RODRÍGUEZ LÓPEZ, sobre a vida e obra do escritor de Paradela. No devandito acto, ao que asistiron máis dun centenar de alumnos de primaria do centro, participaron os alcaldes de Rábade (Francisco Fernández Montes) e Paradela (José Manuel Mato); a Xefa territorial de Cultura da Xunta en Lugo (María Xosé Gómez); a viúva do escritor (Irene López) e o director de  GaliciaDigital (Antonio  Giz). Ademais, presentouse o libro "Manuel Rodríguez López, 25 anos despois", que recolle traballos de 50 personaxes destacados da cultura galega sobre a figura de Manolo Rodríguez.

A mostra forma parte do PROXECTO MANUEL RODRÍGUEZ LÓPEZ, emprendido por GaliciaDigital e a familia do escritor, co apoio do Concello de Paradela, a Xunta de Galicia (Secretaría Xeral de Política Lingüística), a Real Academia Galega, e o Consello Regulador da Denominación de Orixe Ribeira Sacra.

Esta exposición itinerante percorreu xa numerosas cidades e localidades galegas, visitou a Casa de Galicia en Madrid, as Universidades de Granada,  Deusto e Estremadura e os Centros Galegos de Barcelona, Salamanca, León, Vitoria, Las Palmas de Gran Canaria ou Valladolid, e chegou tamén a Portugal, concretamente ao Centro  Galego de Lisboa e as Universidades de Braga e Algarve.

Está composta por oito paneis dobres, nos que se reflicte a vida e obra do escritor paradelense, considerado o mellor poeta obreiro galego do século  XX, que escribiu en Cataluña a maior parte da súa obra, e foi ademais dun gran animador das actividades galegas nesta comunidade, o vínculo perfecto entre Galicia e os galegos emigrantes en Cataluña.

Manuel Rodríguez López é tamén fillo predilecto do Concello de Paradela, e dá nome á Casa Municipal de Cultura e a un Certame Literario do que se está celebrando a  XXIV edición.

Máis información: www.manuelrodriguezlopez.org