Foi presentada na Biblioteca Pública de Pontevedra Antonio Odriozola a exposición MANUEL RODRÍGUEZ LÓPEZ 2.0, sobre a vida e obra do escritor de Paradela. No acto participaron, entre outros, Isabel Couselo, Directora Territorial da Consellería de Cultura, Lingua e Xuventude da Xunta de Galicia en Pontevedra; Pilar Ruiz, directora da Biblioteca Pública de Pontevedra; e Xulio Xiz, presidente do Colectivo Egeria.

A mostra forma parte do PROXECTO MANUEL RODRÍGUEZ LÓPEZ, emprendido por Egeria, GaliciaDigital e a familia do escritor, co apoio do Concello de Paradela, a Xunta de Galicia (Secretaría Xeral da Lingua) e a a Real Academia Galega.

Esta exposición itinerante é a sucesora dunha primeira mostra que percorreu desde o ano 2013 máis de 20.000 quilómetros, pasando por numerosas cidades e localidades galegas, e visitando a Casa de Galicia en Madrid, as Universidades de Granada, Deusto e Estremadura e os Centros Galegos de Barcelona, Salamanca, León, Vitoria, Llodio, Las Palmas de Gran Canaria, Sevilla ou Valladolid, e chegou tamén a Portugal, concretamente ao Centro Galego de Lisboa e as Universidades do Minho (Braga) e Algarve (Faro).

A exposición estará en Pontevedra ata o 15 de xuño, e posteriormente continuará a súa itinerancia por vilas e cidades galegas e do resto de España.

Está composta por doce paneis nos que se reflicte a vida e obra do escritor paradelense, considerado o mellor poeta obreiro galego do século  XX, que escribiu en Cataluña a maior parte da súa obra, e foi ademais dun grande animador das actividades galegas nesta comunidade, o vínculo perfecto entre Galicia e os galegos emigrantes en Cataluña.

Manuel Rodríguez López é tamén fillo predilecto do Concello de Paradela, e dá nome á Casa Municipal de Cultura e a un Certame Literario do que se acaba de presentar a XXXI edición.

Máis información: www.manuelrodriguezlopez.org